2016-2017 оны хичээлийн жилд Хөвсгөл аймгийн хэмжээнд нийт
25 мянга гаруй сурагчид ерөнхий боловсролын сургуульд суралцах ба эдгээрийн 2960
гаруй нь эрдмийн өргөөний босгыг анхлан давж буй 6 настай бяцхан иргэд, хүүхэд багачууд
маань байна. Дэлгэрмөрөн цогцолбор сургуульд энэ жил 2350 хүүхэд суралцах буй
бөгөөд эдгээрээс 240 хүүхэд нь нэгдүгээр ангид шинээр элсэн суралцаж байна.
Энэ хичээлийн жилийг БСШУЯ-наас “Стандартад суурилсан
боловсролын тогтолцоог бий болгох, сургуулийг хүн хөгжлийн төв болгон
хөгжүүлэх, бүх шатны боловсролын байгууллага нь хүүхдэд ээлтэй орчин нөхцлийг
бүрдүүлэх” гэсэн зорилтыг тавьж ажиллаж байгаа бол аймгийн Боловсрол соёлын
газраас энэ хичээлийн жилийг “Сургалтын чанар, үр нөлөөг нэмэгдүүлж Сургуулийн менежмент, багшийн арга зүйг
хөгжүүлэн, суралцагчдын өрсөлдөх чадвар, төлөвшилд ахиц өөрчлөлт гаргана” гэсэн
зорилтыг дэвшүүлэн ажиллаж байна.
Аймгийн ИТХ-ын дарга Л.Төмөрбаатар хэлсэн үгэндээ эх орон, төрсөн нутгийнхаа ирээдүйн хөгжлийг түүчээлэн авч явах эрдэм боловсролтой зөв хүн болон төлөвшиж, хүмүүжихэд багш, сурагч, эцэг эхийн хамтын үүрэг оролцоо чухлыг онцлоод эрдэм номд шамдан суралцах их үйлсэд нь амжилт хүслээ. Мөн Дэлгэрмөрөн цогцолбор сургуулийн хамт олонд зөөврийн компьютер бэлэглэж гардуулан өглөө.
