Хөвсгөл аймгаас УИХ-д бие даан сонгогдсон УИХ-ын гишүүн Цэрэнпилийн Даваасүрэн УИХ-ын чуулганы чөлөөт цагаар өвөлжилт хүндэрч зудын байдалд буй Хөвсгөл аймгийн Цагаан-Үүр, Чандмань-Өндөр, Эрдэнэбулган сумдад ажиллаж байна. Өвөлжилтийн байдал, цаг агаарын хүндрэл зэрэгтэй газар дээр нь үзэж танилцахаас гадна ард иргэдийн санал бодлыг сонсох, УИХ-аас гарсан тогтоол шийдвэрийг сурталчлах зэрэг ажлыг хийж буй юм. Дээрх 3 сумдын хувьд хадлан тэжээл бэлтгэдэг хэмжээгээрээ аймагтаа тэргүүлдэг сумд бөгөөд өнгөрсөн жилийн хувьд зун оройтож болсон, үүнээс шалтгаалж өвч муу ургаснаас төлөвлөж байсан хэмжээнд хадлан тэжээл бэлтгэж чадаагүй байна. Энэ жилийн хувьд Хөвсгөл аймгийн дийлэнх сумдад цас их орж, цаг агаар хүйтэн байгаагаас малын хорогдол гарч эхлээд буй юм.