Олон жил яригдаж буй Эгийн голын Уса цахилгаан станц төсөл нь Монгол улсад эдийн засгийн болон байгаль экологийн хувьд ихээхэн үр ашигтай төсөл юм. Уг станцын техник эдийн засгийн үндэслэл олон жилийн өмнө боловсруулагдсан боловч үе үеийн засгийн газрын хувьд шийдэж чадалгүй байсаар өнөөг хүрсэн. Тэгвэл уг цахилгаан станцын урьдчилсан шатны дэд бүтцийн ажлыг концессийн гэрээгээр байгуулах зөвшөөрлийг засгийн газраас олгожээ. Уг цахилгаан станцын барилгын ажлын 98 сая ам долларын өртөг бүхий ажлыг энэ чиглэлээрээ дэлхийд эхний 5-д ордог БНХАУ-ын компани гүйцэтгэхээр болсон байна. Цахилгаан станц Хөвсгөл нуураас эх авдаг Эгийн голын Булган аймгийн Хутаг- Өндөр сумын нутагт баригдах бөгөөд станцыг даган үүсэх том хэмжээний нуур нь бүс нутгийн эко системд эерэг нөлөө үзүүлээд зогсохгүй загас үржүүлэг, аялал жуулчлалын бизнесийг хөгжүүлэх боломжийг олгож буй юм.