Монгол улс анхдугаар Үндсэн хуулиа баталж, Бүгд Найрамдах улсаа тунхагласны 100 жилийн ойн өдрийг тохиолдуулан Монгол улсын Ерөнхий сайдын ивээл дор өсвөр үе, залуучуудыг түүх, соёлоо дээдэлсэн, эх оронч үзэлтэй, үүрэг хариуцлагаа ухамсарласан иргэн болгон төлөвшүүлэх зорилгоор 16 нас хүрч буй хүүхэд, залуучуудад хүндэтгэл үзүүлэх “Иргэний андгай өргөх ёслол”-ын арга хэмжээ аймгийн ЗДТГ-ын Соёмбо танхимд зохион байгуулагдлаа.

Энэхүү арга хэмжээнд аймгийн ИТХ-ын дарга Д.Пүрэвдорж, аймгийн ЗДТГ-ын дарга Г.Гандэлгэр, аймгийн ЗДТГ-ын Нийгмийн бодлогын хэлтсийн дарга Д.Цэцэгмаа, Мөрөн сумын Засаг дарга Д.Тайванбаяр, Мөрөн сумын ИТХ-ын дарга Л.Баярхүү болон бусад агентлаг, байгууллагын удирдлагууд оролцлоо.

Хөвсгөл аймгийн ЗДТГ, аймгийн Боловсролын газар, Соёл урлаг, аялал жуулчлал, залуучуудын газар, Хүүхэд, гэр бүлийн хөгжил, хамгааллын газар, Улсын бүртгэлийн хэлтэс “Иргэний андгай өргөх ёслол”-ын арга хэмжээг хамтран зохион байгуулсан бөгөөд Мөрөн сумын ЕБС-ийн 170 гаруй хүүхэд тус арга хэмжээнд оролцсоноос 51 хүүхэд иргэний үнэмлэхээ батламжийн хамт гардан авлаа.

Арга хэмжээний үеэр Мөрөн сумын Авьяас сургууль болон Хүүхдийн ордны уран нугаралтын дугуйлангийн сурагчид урлагийн авьяасаа нийт зочид төлөөлөгчид,хүүхдүүдэд үзүүлснээс гадна Сод-Эрдэм ЕБС-ийн түүх нийгмийн багш Т.Наранхүү, Хилийн цэргийн 0257 дугаар ангийн Соён гэгээрүүлэх тасгийн дарга, хошууч Б.Нямсайхан нар “Тусгаар тогтнол ба үнэ цэн”, “Бид эх орондоо хайртай” сэдвүүдээр илтгэл тавилаа.