Хөвсгөл аймгийн иргэдийн Төлөөлөгчдийн Хурлын дарга Г.Мөнгөнхуягийн санаачилгаар аймгийн ИТХ-ын ажлын алба, Ренчинлхүмбэ сумын ИТХ-ын ажлын алба хамтран "Хойд бүс-2023" сургалт зөвлөгөөнийг зургаадугаар сарын 15-16-ны өдрүүдэд зохион байгуулж байна.
Хөвсгөл аймгийн Ренчинлхүмбэ суманд зохион байгуулж буй энэхүү арга хэмжээнд Ханх, Алаг-Эрдэнэ, Баянзүрх, Улаан-Уул, Цагааннуур , Ренчинлхүмбэ сумдын ИТХ-ын төлөөлөгчид, Ажлын албаны хамт олон болон хойд бүсийн сумдаас сонгогдсон аймгийн ИТХ-ын төлөөлөгч Х.Рагчаа, Б.Батжаргал, Н.Батцул нар оролцож байна.
Аймгийн ИТХ-ын дарга Г.Мөнгөнхуяг "Бүсчилсэн хөгжлийн зорилтыг хэрэгжүүлэхэд хойд бүсийн сумд хэрхэн оролцох талаар саналаа солилцсон чухал арга хэмжээ болж байна" гэж онцоллоо.
"Хойд бүс-2023" сургалт зөвлөгөөний үеэр Удирдлагын академийн багш, доктор, профессор Л.Отгонтуяа "Орон нутгийн хөгжлийн бодлого төлөвлөлт ба төсвийн хөрөнгө оруулалтын уялдаа" , аймгийн ИТХ-ын ажлын албаны Бодлогын хэрэгжилт, иргэний оролцооны хэлтсийн дарга Р.Машбат "Монгол Улсын Засаг захиргаа нутаг дэвсгэрийн нэгж түүний удирдлагын тухай хууль" сэдвээр мэдээлэл хийлээ.
Мөн хойд бүсийн сумдын ИТХ-ын төлөөлөгчид, ажлын албаны хамт олон сайн туршлагаа хуваалцаж, тулгамдсан асуудлаар болон цаашид хэрэгжүүлэх зорилго, зорилтын талаар санал бодлоо хуваалцав.
