Хөвсгөл аймгийн Ренчинлхүмбэ сумын Шаргын голын уугуул Унадаг дугуйн бартаат замын аяллын холбооны тэргүүн Раднаагийн Хадбаатар тэргүүтэй аялагчид унадаг дугуйгаар Хөвсгөл далайг нар зөв бүтэн тойрчээ. Аялал 4 дэх жилдээ зохион байгуулагдаж  "Хөвсгөл сорилт 2018" унадаг дугуйн бартаат замын аяллын багийн гишүүд 18-58 насныхан бөгөөд 2 эмэгтэй, 8 эрэгтэй дугуйчид оролцсон бөгөөд  БНСУ-ын дугуйчин Ким Жун Шин 2 дахь удаагаа оролцож Хөвсгөл далайг унадаг дугуйгаар тойрчээ. Дугуйчид аялалаа Хатгалаас  эхлүүлж Жиглэгийн ам, Ханх, Сантын нуруунд хоноглож аялалаа 5 өдөрт амжилттай дуусгажээ. Аялалын багийн тэргүүн Р.Хадбаатар жил бүрийн өвөл мөсөөр зун газраар хоёр удаа Хөвсгөл нуурыг унадаг дугуйгаар тойрдог бөгөөд энэ удаа тэрээр 7 дахь удаагаа тойрч байгаа гэнэ. Харин энэ удаагийн аялалд оролцогчдын дийлэнх нь шинэ дугуйчид оролцсоноороо онцлог бөгөөд багийн гишүүд өөрсдийн сонирхолоороо нэгдсэн бөгөөд жил бүр уламжлал болгон зохион байгуулагдах ажээ.