Дархан-Уул аймгийн засаг даргын 2017-2020 оны үйл ажиллагааны хөтөлбөрт эмнэлгийн тусламж үйлчилгээг үйлчлүүлэгчдэд чирэгдэлгүй, хүлээгдэлгүй авах нөхцөлийг бүрдүүлэх зорилтыг дэвшүүлсэн. Энэхүү зорилтын хүрээнд “Шилэн эмнэлэг” төслийг аймгийн ИТХ-ын Тэргүүлэгчдийн хурлаар батлуулан хэрэгжүүлж байгаа билээ. Тус эмнэлгийн эхний шат өнгөрсөн 9 дүгээр сард хэрэгжиж эхэлсэн бол 12 дугаар сарын 21-нд 2 дах шат нээлтээ хийн хэрэгжиж эхэллээ. Эхний ээлжид Нэгдсэн эмнэлгийн амбулаторийг бүрэн хэмжээнд камержуулж иргэдийн цаг завыг хэмнэн оочир, дугаарлалтыг цахимжуулж /7037-1103/ утсаар болон /emneleg.darkhan.mn/ хаягаар эмчид үзүүлэх номер дугаараа авах, шуурхай ил тод нээлттэй байдлыг хангасан байна. Харин 2 дахь шатанд Түргэн тусламжийн 103-ийн үйл ажиллагааг хөнгөвчилж дуудлагын 12 автомашинаас 10-т нь gps аппарат суурилуулжээ. Энэхүү gps-ийг авто машинуудад суурилуулснаар тухайн дуудлагын авто машин хаана, ямар хурдтай явж байгааг хянах бүрэн боломжтой болж байгаараа онцлог юм. Өнөөдрийн байдлаар Дархан-Уул аймгийн Нэгдсэн эмнэлгийн 103 дуудлагын утсанд өдөрт 90-100 дуудлага ирж байгаа ажээ. Дуудлагын дийлэнх хувийг томуугийн өвчлөл, даралт, зүрх, авто ослын дуудлага эзэлж байгаа юм байна.