Ерөнхий боловсрол улсын хэмжээнд төрийн өмчийн 654 сургуульд 538.846 сурагч, төрийн бус 144 сургуульд 37.033 сурагч нийт 798 сургуульд 575.879 сурагч суралцах аж. Харин 1-р ангид 73.545 хүүхэд элсэн суралцана. 6 настнууд өнгөрсөн оныхоос 11.300-гаар нэмэгджээ. Дээд боловсролын тухайд улсын хэмжээнд нийт 96 их, дээд сургуульд 150 мянган оюутан суралцах аж.

Хөвсгөл аймгийн хувьд энэ хичээлийн жилд 36 сургуульд 26245 хүүхэд, төрийн өмчийн 38, хувийн хэвшлийн 6 цэцэрлэгт өдрөөр 8208 хүүхэд хамрагдана. Нэгдүгээр ангид шинээр 2862 хүүхэд элсэн суралцахаар байна.  

Жил бүрийн хичээлийн шинэ жилийн нээлтэнд аймгийн удирдлагууд оролцож мэндчилгээ дэвшүүлдэг бөгөөд энэ жилийн хувьд аймгийн ИТХ-ын дарга Л.Төмөрбаатар хөдөө орон нутагт ажиллаж буй бөгөөд Шинэ-Идэр сумын ЕБС-ийн хичээлийн шинэ жилийн нээлтэнд оролцож байгаа аж. 

Хөвсгөл аймгийнхаа үе үеийн багш сурган хүмүүжүүлэгчид, эрдмийн шимийг түгээгч эрхэм багш нар, эцэг эхчүүд, нийт сурагчиддаа хичээлийн шинэ жилийн баярын мэнд хүргэж, сурлага хөдөлмөрийн өндөр амжилт хүсье.