Өчигдөр буюу 2017.04.30 ны өдөр Монгол бөхийн өргөөнөө Хөвсгөлийн хүчтэн бөхийн дэвжээ, Хөвсгөл хөгжил сан, Монголын үндэсний бөхийн холбоотой хамтран эдүгээ 93 насыг зооглоод буй улсын цолтой хамгийн ахмад бөх Монгол улсын хурц арслан, Соёлын гавьяат зүтгэлтэн, нэрт бөхийн тайлбарлагч Цэрэннадмидын Бадамсэрээжидэд хүндэтгэл үзүүлэх улс, аймгийн алдар цолтой хүчит 256 бөхийн барилдааныг өндөр түвшинд зохион байгууллаа. Уг барилдаанд хурц арслангийн нутгийн хүү Тосонцэнгэл сумын харьяат Хөвсгөлийн хүчтэн бөхийн дэвжээ, Хил хамгаалах ерөнхий газрын хилчин биеийн тамир спорт хороо, хилийн цэргийн шалган нэвтрүүлэх 0108 дугаар анги, Монос группын бөх улсын өсөх идэр үнэн зоригт цогт гарамгай харцага Цэдэвийн Содномдорж түрүүлж, Шинэ-Идэр сумын харьяат Хил хамгаалах ерөнхий газрын хилчин биеийн тамир спорт хороо, хилийн цэргийн 0257 дугаар анги, Дулааны 3 дугаар цахилгаан станцын бөх улсын шинэ начин Б.Ганхуяг үзүүрлэж, их шөвгийн дөрөвт Архангай аймгийн Эрдэнэбулган сумын харьяат Алдар спорт хороо, Алтан дорнод монгол ХХК-ий бөх улсын арслан Р.Пүрэвдагва, Галт сумын харьяат Хил хамгаалах ерөнхий газрын хилчин биеийн тамир спорт хороо, хилийн цэргийн 0253 дугаар анги, Дулааны 4 дүгээр цахилгаан станц, Шижир гоулд ХХК-ий бөх улсын шинэ залуу начин Ч.Хөхчирэнгэр нар шалгарлаа. Ийнхүү 2017 оны 04 дүгээр сарын 29-ны бямба гаригт болсон сумын заануудын барилдаан, 30-ны ням гаригт болсон Улсын цолтой бөхчүүдийн барилдаанд дараалан Хөвсгөл нутгийн бөхчүүд түрүүллээ. Нондин яг өдийд дараалсан 2 барилдааны аймаг цэрэгт одоогийн улсын начин Б.Ганхуяг, улсын цолтой бөхөд харцага Ц.Содномдорж нар түрүүлж байсан түүх бий. Өвгөн арслангийн хүндэтгэлийн барилдаан үнэхээр сайхан болж, арслангийн хүүхэд нас, цэргийн албанд татагдсан, алдарт сээрэн дунгуй мэхийг үзүүлсэн бөгөөд Хөвсгөлийн хүчтэн дэвжээний тэргүүн, Эрчим хүчний сайд П.Ганхүү, УИХ-н гишүүн, Хөвсгөл хөгжил сангийн тэргүүн Л.Мөнхбаатар нар өвгөн арсланд хүндэтгэл үзүүлэн 10 сая төгрөг гардууллаа. Мөн Хөвсгөлийн хүчтэн дэвжээний бөхчүүд у/а Х.Мөнхбаатар, у/х Ц. Содномдорж, Г.Элбэг, у/н Б.Баянмөнх, А.Батмөнх, Б.Ганхуяг, Ч.Хөхчирэнгэр нарын тэргүүтэй улс, аймаг, сумын цолтой бөхчүүд арсландаа хүндэтгэл үзүүллээ. Ийнхүү Хөвсгөл нутгийнхан өвгөн буурал арсландаа хүндэтгэл үзүүлэж, буяныг нь тосож авлаа. Өвгөн арслангийн хүндэтгэлийн барилдааны шөвгийн 8 бөхийн 5 нь Хөвсгөл нутгийн бөхчүүд байв. Тэртээ 1958 оны улсын наадмын 8 бөхийн 5 нь Хөвсгөл нутгийн хүчтэнүүд байсан амжилттай адил байна. Улсын наадмын энэ амжилтыг 1958 оноос хойш давтагдаагүй бөгөөд цаашид ч давтахад хэцүү амжилт юмаа. Хоймор нутаг аргагүй бөхийн өлгий нутаг гэдгээ баталж зааланд дахин 8 бөхийн 5 нь шалгаран үлдлээ. Зааланд ч ингэж үлдсэн нь ч ховорхон тохиол билээ.
Удахгүй болох улсын наадамд Улс, аймаг, сумын цолтонгууд Хөвсгөл нутгаас олноор төрөх болтугай.
